Mahigit 142 milyong dosis ng bakuna laban sa COVID-19 ang naibigay sa buong Tsina

Nakapagbigay na ang Tsina ng 102.4 milyong dosis ng bakuna laban sa COVID-19 hanggang Marso 27, ayon sa National Health Commission ng Tsina noong Linggo.

 

Ang pandaigdigang suplay ng dalawang bakuna laban sa COVID-19 na binuo ng mga subsidiary ng Sinopharm ng Tsina ay lumampas na sa 100 milyon, ayon sa isang subsidiary noong Biyernes. Limampung bansa at rehiyon ang nag-apruba sa mga bakuna ng Sinopharm para sa komersyal o pang-emerhensiyang paggamit, at mahigit 80 milyong dosis ng dalawang bakuna ang naibigay na sa mga tao mula sa mahigit 190 bansa.

 

Pinapalakas ng Tsina ang plano nitong pagbabakuna upang bumuo ng mas malawak na panangga sa kaligtasan sa sakit, ayon kay Wu Liangyou, deputy director ng disease control bureau ng NHC. Nakatuon ang plano sa mga pangunahing grupo, kabilang ang mga taong nasa malalaki o katamtamang laki ng mga lungsod, mga lungsod na daungan o mga lugar sa hangganan, mga kawani ng mga negosyong pag-aari ng estado, mga estudyante sa kolehiyo at mga lektor, at mga kawani ng supermarket. Ang mga taong higit sa edad na 60 o may mga malalang sakit ay maaari ring makatanggap ng bakuna upang maprotektahan mula sa virus.

 

Ayon kay Wu, 6.12 milyong dosis ng bakuna ang naibigay noong Biyernes.

 

Ang pangalawang dosis ay dapat ibigay tatlo hanggang walong linggo pagkatapos ng unang iniksyon, payo ni Wang Huaqing, punong eksperto para sa plano ng pagbabakuna sa Chinese Center for Disease Control and Prevention, sa press briefing noong Linggo.

 

Pinapayuhan ang mga tao na tumanggap ng dalawang dosis ng iisang bakuna, ani Wang, at idinagdag na lahat ng karapat-dapat para sa bakuna ay dapat tumanggap ng mga bakuna sa lalong madaling panahon upang mapalakas ang herd immunity.

 

Napatunayang epektibo ang dalawang bakuna ng Sinopharm laban sa mahigit 10 variant na matatagpuan sa UK, South Africa at iba pang mga lugar, ayon kay Zhang Yuntao, bise presidente ng China National Biotec Group, na kaakibat ng Sinopharm.

 

Marami pang mga pagsusuri ang isinasagawa hinggil sa mga variant na natagpuan sa Brazil at Zimbabwe, ani Zhang. Ang datos ng klinikal na pananaliksik sa mga batang may edad 3 hanggang 17 ay nakamit ang mga inaasahan, na nagmumungkahi na ang grupo ay maaaring maisama sa plano ng pagbabakuna sa malapit na hinaharap, dagdag ni Zhang.